എം. എസ്. എം. ഇ യും സാമ്പത്തിക വികസനവും [MSMEs and Economic Development]

ജി. കൃഷ്ണപിള്ള

ഇന്ത്യയുടെ സാമ്പത്തിക വികസനത്തിൽ സൂക്ഷ്മ – ചെറുകിട – ഇടത്തരം സംരംഭ മേഖലയ്ക്ക് (Micro-Small-Medium Enterprise Sector – MSME) വളരെ പ്രധാനപ്പെട്ട ഒരു സ്ഥാനമാണുള്ളത്. 2006- ന് മുൻപ് ഇന്ത്യയിൽ വ്യവസായങ്ങൾ നിയന്ത്രിക്കുന്നതിനും വികസിപ്പിക്കുന്നതിനുമായി 1951- ലെ വ്യവസായ (വികസനവും നിയന്ത്രണവും) നിയമമായിരുന്നു നിലവിലുണ്ടായിരുന്നത്. പുതിയ വ്യവസായങ്ങൾ ആരംഭിക്കുന്നതിനും സ്ഥാപിക്കുന്നതിനും നിയന്ത്രണങ്ങൾ ചുമത്തുന്നതിനും കേന്ദ്ര ഗവൺമെന്റിന് അധികാരം നൽകുന്ന നിയമമാണിത്. ഈ നിയമം അനുസരിച്ച് വ്യവസായങ്ങൾക്ക് അനുവദിക്കുന്ന ലൈസൻസുകൾ ഭേദഗതി ചെയ്യുന്നതിനും റദ്ദ് ചെയ്യുന്നതിനും കേന്ദ്ര ഗവൺമെന്റിന് അധികാരം നൽകുന്ന നിയമമായിരുന്നു ഇത്.

സൂക്ഷ്മ -ചെറുകിട -ഇടത്തരം സംരംഭ വികസന നിയമം – 2006 (MSMED Act- 2006)
2006 ഒക്ടോബർ രണ്ടാം തീയതി മുതലാണ് സൂക്ഷ്മ ചെറുകിട ഇടത്തരം സംരംഭ വികസന നിയമം (Micro Small Medium Enterprises Development Act) 2006 പ്രാബല്യത്തിൽ വന്നത്. ‘വ്യവസായം’ എന്നതിന് പകരം ‘സംരംഭം’ എന്ന പദമാണ് ഈ നിയമം ഔദ്യോഗികമായി അംഗീകരിച്ചത്. എം എസ് എം ഇ എന്നീ അക്ഷരങ്ങൾ യഥാക്രമം പ്രതിനിധീകരിക്കുന്നത് എം മൈക്രോ (Micro) എസ്- സ്മാൾ (Small) എം – മീഡിയം (Medium) ഇ – എന്റർപ്രൈസ് (Enterprise) എന്നിങ്ങനെയാണ്

എം എസ് എം ഇകളുടെ നിർവചനം (Definitions of MSMEs)
സംരംഭം തുടങ്ങുന്ന നിക്ഷേപത്തിന്റെയും വാർഷിക വില്പനയുടെയും അടിസ്ഥാനത്തിലാണ് സംരംഭങ്ങളെ വർഗ്ഗീകരിച്ചിരിക്കുന്നത്. 2020- ലെ എം. എസ്. എം. ഇ വികസന നിയമ ഭേദഗതിയുടെ അടിസ്ഥാനത്തിലുള്ളതാണ് നിലവിലെ നിർവചനം.

തരം	നിക്ഷേപതുക	വാർഷിക വിൽപന
സൂക്ഷ്മം	1 കോടി   വരെ	5 കോടി വരെ
ചെറുകിടം	10 കോടി  വരെ	50 കോടി വരെ
ഇടത്തരം	50 കോടി  വരെ	250 കോടി വരെ

സാമ്പത്തിക വികസനം (Economic Development)
ഒരു രാജ്യത്തിന്റെ സാമ്പത്തിക വികസനത്തിന് എം. എസ്. എം. ഇ യുടെ പങ്ക് പ്രധാനപ്പെട്ടതാണ്. സാമ്പത്തിക വികസനത്തിന് എം. എസ്. എം. ഇ യുടെ പ്രാധാന്യം താഴെപ്പറയുന്ന ഘടകങ്ങളുടെ അടിസ്ഥാനത്തിൽ വിശദീകരിക്കാവുന്നതാണ്.

1. മൊത്തം ആഭ്യന്തര ഉൽപാദനത്തിലേക്കുള്ള സംഭാവന (Contribution to Gross Domestic Product GDP)
ഇന്ത്യയുടെ മൊത്തം ജിഡിപിയുടെ ഏകദേശം 30% ആണ് എം. എസ്. എം. ഇ മേഖലയുടെ സംഭാവന. ഇന്ത്യയുടെ മൊത്തം ജിഡിപിയുടെ മൂന്നിൽ ഒരു ഭാഗം സംഭാവന ചെയ്യുന്നത് എം. എസ്. എം. ഇ മേഖലയാണ്.

2. തൊഴിൽ (Employment)
ഇന്ത്യയുടെ തൊഴിൽമേഖലയ്ക്ക് എം. എസ്. എം. ഇ യുടെ സംഭാവന 11 കോടിക്ക് മുകളിലാണ്. ഗ്രാമീണ മേഖലയിലും തൊഴിലവസരങ്ങൾ സൃഷ്ടിക്കുന്നതിന് എം. എസ്. എം. ഇ മേഖല സഹായിക്കുന്നു.

3. കയറ്റുമതി (Export)
ഇന്ത്യയുടെ മൊത്തം കയറ്റുമതിയുടെ 40% ത്തിൽ കൂടുതലും ഈ മേഖലയാണ് സംഭാവന ചെയ്യുന്നത്.

വർഷം	സംഭാവന
2021-22	45.3%
2022-23	43.59%
2023-24	45.73%

4. പ്രാദേശിക സാമ്പത്തിക വികസനം (Regional Development)
പ്രാദേശിക സാമ്പത്തിക വികസനത്തിൽ ഈ മേഖലയുടെ പ്രാധാന്യം നിർണായകമാണ്. വരുമാനത്തിനുള്ള അസമത്വം ലഘൂകരിക്കുന്നതിന് ഇത് സഹായിക്കുന്നു.

5. സുസ്ഥിര വികസനം (Sustainable Development)
ഊർജ്ജ ഉപഭോഗത്തിന്റെ അളവ് കുറയ്ക്കാനും ചെലവ് ചുരുക്കുവാനും പാരിസ്ഥിതിക നേട്ടങ്ങൾ കൈവരിക്കുവാനും ഈ മേഖല സഹായകരമാകുന്നു.

6. സർക്കാർ പിന്തുണ (Government Support)
വായ്പാബന്ധിത മൂലധന സബ്സിഡി പോലെയുള്ള പദ്ധതികൾ സർക്കാരിൽ നിന്നും ലഭിക്കുന്നതിലൂടെ സാങ്കേതികവിദ്യ മെച്ചപ്പെടുത്തുവാനും അതിലൂടെ വ്യവസായിക ഉത്പാദനക്ഷമത വർധിപ്പിക്കുവാനും കഴിയുന്നു.

7. നൂതനാശയങ്ങൾ വളർത്തുന്നു (Growth of  Innovation)
എം. എസ്. എം. ഇ കൾ നൂതനാശയങ്ങൾ പ്രോത്സാഹിപ്പിക്കുന്നതിലൂടെ സംരംഭകത്വം പരിപോഷിക്കുന്നതിന് സഹായകരമാകുന്നു.

8. എം. എസ്. എം. ഇ യെ ശക്തമാക്കുന്നതിനുള്ള പദ്ധതികളും സേവനങ്ങളും (Programmes for Strengthening the MSME Sector)
(1) ഉദ്യം രജിസ്ട്രേഷൻ
സ്വന്തമായി സൂക്ഷ്മ, ഇടത്തരം, ചെറുകിട സംരംഭങ്ങൾ ആരംഭിക്കാൻ ആഗ്രഹിക്കുന്ന ഏതൊരു സംരംഭത്തിനും രജിസ്ട്രേഷൻ തിരഞ്ഞെടുക്കാം. ഉൽപാദന- സേവന- ട്രേഡിങ് സംരംഭങ്ങൾ പോർട്ടലിൽ രജിസ്റ്റർ ചെയ്യാൻ കഴിയുന്നതാണ്. ഉദ്യം രജിസ്ട്രേഷൻ എടുക്കുന്നത് കൊണ്ട് വായ്പാബന്ധിത സബ്സിഡി പദ്ധതികൾ ഉൾപ്പെടെ അനവധി ആനുകൂല്യങ്ങളും പദ്ധതികളും ലഭിക്കുന്നതാണ്.

(2) സി ജി റ്റി എം എസ് എം ഇ
അഞ്ചു കോടി രൂപ വരെയുള്ള കൊളാറ്ററൽ ഫ്രീ ലോൺ എം. എസ്. എം. ഇ കൾക്ക് ലഭിക്കുന്നതാണ്.

(3) പി. എം. ഇ. ജി. പി, പി എം എഫ് എം ഇ, പി എം വിശ്വകർമ്മ, പി എം സ്ട്രീറ്റ് വെണ്ടർസ് സ്കീം എന്നിവ സൂക്ഷ്മ – ചെറുകിട – ഇടത്തരം സംരംഭകർക്ക് ലഭിക്കുന്നതാണ്.

(4) സെഡ് സർട്ടിഫിക്കേഷൻ (ZED Certification)
സീറോ ഡിഫക്ട് സീറോ ഇഫക്ട് എന്ന പദ്ധതിയിലൂടെ ഗുണമേന്മ വർദ്ധിപ്പിക്കുവാനും, സുരക്ഷിതത്വം ഉറപ്പാക്കുന്നതിനും, ഉൽപാദനക്ഷമത വർധിപ്പിക്കുവാനും കഴിയുന്നതാണ്. മാനദണ്ഡങ്ങൾ പാലിക്കുന്നതിന്റെ അടിസ്ഥാനത്തിൽ സംരംഭങ്ങൾക്ക് മൂന്നു തരത്തിലുള്ള സർട്ടിഫിക്കേഷൻ ലഭിക്കുന്നു. ഏറ്റവും കുറവ് മാനദണ്ഡം പാലിക്കുന്ന സംരംഭങ്ങൾക്ക് ബ്രോൺസ് സർട്ടിഫിക്കേഷനും, ഏറ്റവും കൂടുതൽ പാലിക്കുന്നതിന് ഗോൾഡും, ഇതിന് രണ്ടിനും ഇടയിൽ മാനദണ്ഡം പാലിക്കുന്നതിന് സിൽവറും ലഭിക്കുന്നു.

(5) എം എസ് എം ഇ ഫെസിലിറ്റേഷൻ കൗൺസിൽ
2006 ലെ എം. എസ്. എം. ഇ നിയമത്തിന്റെ സെക്ഷൻ 15 അനുസരിച്ച് എം. എസ്. എം. ഇ കൾക്ക് 45 ദിവസത്തെ പേയ്മെന്റ് റൂൾ എന്ന പരിരക്ഷ ലഭിക്കുന്നു. എം. എസ്. എം. ഇ കൾ മതിയായ തെളിവുകളോടുകൂടി വിൽപ്പന (ക്രെഡിറ്റ്) നടത്തുന്ന സാധനങ്ങളുടെ വില 45 ദിവസത്തിനുള്ളിൽ തിരികെ ലഭിക്കണമെന്ന് ഈ നിയമം വ്യവസ്ഥ ചെയ്യുന്നു. സാധനങ്ങൾ വാങ്ങുന്നയാൾ ഈ നിയമം പാലിക്കാത്ത പക്ഷം അവർക്കെതിരെ htt:/samadhan.msme.gov.in എന്ന പോർട്ടൽ മുഖേന കേസ് ഫയൽ ചെയ്യാവുന്നതാണ്. ഇങ്ങനെ വീഴ്ച വരുത്തുന്നവർക്കെതിരെ ഈ നിയമത്തിന്റെ വകുപ്പ് 16 അനുസരിച്ച് ലഭിക്കാത്ത തുകയോടൊപ്പം റിസർവ് ബാങ്ക് നിശ്ചയിക്കുന്ന ബാങ്ക് റേറ്റിന്റെ മൂന്നിരട്ടിയും ചേർത്തുള്ള തുക നൽകുന്നതിന് പിഴ ചുമത്തുന്നതാണ്.

(6) റാമ്പ് (RAMP- Raising and Accelerating MSME Productivity)
ഇന്ത്യയിലെ എം. എസ്. എം. ഇ കളുടെ ഉത്പാദനക്ഷമതയും മത്സരക്ഷമതയും ഉയർത്തുന്നതിന് വേണ്ടി ലോകബാങ്ക് ഇന്ത്യ ഗവൺമെന്റിന് തുക അനുവദിച്ചിരിക്കുന്ന പദ്ധതിയാണ് റാമ്പ്. സാങ്കേതികവിദ്യ ഉയർത്തൽ, നൂതനാശയങ്ങൾ, ഡിജിറ്റൈസേഷൻ, വിപണി പിന്തുണ, വായ്പ, സുസ്ഥിരവികസനം എന്നീ പരിപാടികളിലൂടെ എം. എസ്. എം. ഇ കളുടെ പ്രവർത്തനം മെച്ചപ്പെടുത്തുക എന്നുള്ളതാണ് ഈ പദ്ധതിയുടെ ലക്ഷ്യം.

(7) എം എസ് എം ഇ ഡിജിറ്റലൈസേഷൻ (MSME Degitalization)
എം എസ് എം കളുടെ ബിസിനസ് പ്രവർത്തനങ്ങൾ, മത്സരക്ഷമത, കാര്യക്ഷമത എന്നിവ ഡിജിറ്റൽ സാങ്കേതികവിദ്യ ഉപയോഗിച്ച് മെച്ചപ്പെടുത്തുക എന്നതാണ് എം എസ് എം ഇ ഡിജിറ്റലൈസേഷൻ പ്രക്രിയകൊണ്ട് ലക്ഷ്യമിടുന്നത്. ഡിജിറ്റലൈസേഷൻ പ്രക്രിയ ഉപയോഗിക്കുന്ന സംരംഭങ്ങൾക്ക് ഈ പദ്ധതി പ്രകാരം ഇൻസെന്റീവ്, നികുതി ഇളവ് മുതലായവ ഉറപ്പുവരുത്തുന്നു.

എം. എസ്. എം. ഇ കളും സർക്കാർ ബഡ്ജറ്റുകളും (MSMEs and Government Badgets)
മുൻവർഷങ്ങളിലെ ബഡ്ജറ്റുകളിൽ എല്ലാം തന്നെ ഓരോ സാമ്പത്തിക വർഷവും എം. എസ്. എം. ഇ കളുടെ ബഡ്ജറ്റ് വിഹിതം വർദ്ധിപ്പിക്കുന്നതായി കാണാം. ഇന്ത്യൻ സമ്പദ് വ്യവസ്ഥയിൽ എം. എസ്. എം. ഇ കളുടെ പ്രാധാന്യം ഇത് വെളിപ്പെടുത്തുന്നു.

വർഷം	ബഡ്ജറ്റ് വിഹിതം
2021-22	15699.65 കോടി
2022-23	21422 കോടി
2023-24	22138 കോടി
2024-25	(ഇടക്കാലം) 22137.95 കോടി

എം. എസ്. എം. ഇ കളുടെ വളർച്ച (Growth of MSMEs)
ഓരോ വർഷവും ഉദ്യം രജിസ്ട്രേഷൻ എടുക്കുന്ന എം. എസ്. എം. ഇ കളുടെ എണ്ണം വർദ്ധിച്ച് വരികയാണ്. ഏറ്റവും കൂടുതൽ രജിസ്റ്റർ ചെയ്യുന്നത് സൂക്ഷ്മ സംരംഭങ്ങളാണ്.

വർഷം	എണ്ണം
2022	85,82,179
2023	1,50,27,865
2024 (05.08.2024 വരെ)	4,78,02,581

കേരളവും എം എസ് എം ഇ മേഖലയും (Kerala MSME Sector)
സൂക്ഷ്മ – ചെറുകിട – ഇടത്തരം സംരംഭ മേഖല സംസ്ഥാനത്തിന്റെ സാമ്പത്തിക വികസനത്തിൽ പ്രധാന പങ്ക് വഹിക്കുന്നു. എം. എസ്. എം. ഇ മേഖല കേരള സമ്പദ്വ്യവസ്ഥയുടെ വികസനത്തിന് നൽകുന്ന സംഭാവന താഴെ പറയുന്ന രീതിയിൽ വ്യക്തമാക്കാവുന്നതാണ്:-

(1) തൊഴിൽ സൃഷ്ടി (Job Creation)
സംസ്ഥാനത്ത് കൂടുതൽ തൊഴിൽ അവസരങ്ങൾ സൃഷ്ടിക്കുന്നതിൽ എം. എസ്. എം. ഇ മേഖല
പ്രധാന പങ്കു വഹിക്കുന്നു.

വർഷം	തൊഴിൽ (എണ്ണം)
2021-22	44,975
2022-23	3,00,051
2023-24	4,56,913

(2) വ്യവസായവൽകരണം (Industrialisation)
കേരളത്തിന്റെ മൊത്തത്തിലുള്ള പ്രദേശങ്ങളുടെ പ്രത്യേകിച്ച് പിന്നോക്ക – ഗ്രാമ പ്രദേശങ്ങളുടെ വ്യവസായവൽകരണത്തിന് എം. എസ്. എം. ഇ കൾ സഹായിക്കുന്നു. രജിസ്റ്റർ ചെയ്ത എം. എസ്. എം. ഇ കളുടെ വളർച്ച ഓരോ വർഷവും വർദ്ധിച്ചു വരുന്നതായി കാണാം.

വർഷം	തൊഴിൽ (എണ്ണം)
2021-22	17,300 (ഏകദേശം)
2022-23	1,39,840
2023-24	2,40,396

(3) സാമൂഹ്യ സാമ്പത്തിക വികസനം (Socio-Economic Development)
സംസ്ഥാനത്തിന്റെ സാമൂഹ്യ സാമ്പത്തിക വികസനത്തെ എം. എസ്. എം. ഇ കൾ സഹായിക്കുന്നു.

(4) പ്രാദേശിക സാമ്പത്തിക വികസനം (Regional Economic Development)
സന്തുലിതമായ സാമ്പത്തിക വികസനം സൂക്ഷ്മ ചെറുകിട ഇടത്തരം സംരംഭ മേഖലയിലൂടെ കൈവരിക്കുവാൻ കഴിയുന്നതാണ്.

(5) സംസ്ഥാന ആഭ്യന്തര ഉത്പാദനത്തിലേക്ക് എം. എസ്. എം. ഇ കളുടെ സംഭാവന
സംസ്ഥാനത്തിന്റെ ആഭ്യന്തര ഉൽപാദനത്തിലേക്ക് സംസ്ഥാന എം എസ് എം ഇ യുടെ സംഭാവന 37.5 % ആണ്. 2023 – 24 ഇൽ ഇന്ത്യയുടെ ആഭ്യന്തര ഉൽപാദനത്തിലേക്ക് കേരളത്തിൻറെ സംഭാവന നാല് ശതമാനമാണ്.

(6) രാജ്യത്തിന്റെ കയറ്റുമതിയിലേക്കുള്ള സംഭാവന (Contribution to Indian Exports from Kerala)
രാജ്യത്തിന്റെ കയറ്റുമതിയിലേയ്ക്ക് കേരളത്തിലെ എം. എസ്. എം. ഇ മേഖല 40% ത്തിൽ കൂടുതൽ സംഭാവന ചെയ്യുന്നു.

സംസ്ഥാന സർക്കാരിന്റെ തീവ്രപരിപാടികൾ (State Govt’s Drive Programme)
എം. എസ്. എം. ഇ മേഖലയുടെ വളർച്ചയ്ക്ക് വേണ്ടി സംസ്ഥാന സർക്കാർ അനവധി തീവ്ര പരിപാടികളാണ് ആവിഷ്കരിച്ച് നടപ്പിലാക്കി കൊണ്ടിരിക്കുന്നത്.

(1) സംരംഭക വർഷം (Year of Enterprise)
സംസ്ഥാന സർക്കാർ 2022 – 23 സംരംഭക വർഷമായി (Year of Enterprise) പ്രഖ്യാപിച്ചിരുന്നു. ഒരു ലക്ഷം സംരംഭങ്ങൾ സ്ഥാപിക്കുന്നതിനാണ് ലക്ഷ്യമിട്ടിരുന്നതെങ്കിലും ഈ കാലയളവിൽ 1,39,840 പുതിയ സംരംഭങ്ങൾ രജിസ്റ്റർ ചെയ്തു. സംസ്ഥാനത്ത് 8422 കോടി രൂപയുടെ നിക്ഷേപവും 3,00,051 പുതിയ തൊഴിൽ അവസരങ്ങളും ഇതിലൂടെ സൃഷ്ടിക്കാൻ കഴിഞ്ഞു.

(2) എം. എസ്. എം. ഇ ഇൻഷുറൻസ്
അത്യാഹിത സാഹചര്യങ്ങളിൽ എം എസ് എം ഇ കൾക്ക് ഉണ്ടാകുന്ന സാമ്പത്തിക നഷ്ടത്തിൽ നിന്ന് മോചനം നേടുന്നതിനുവേണ്ടി 2023 – 24 കാലയളവിൽ സംസ്ഥാന വ്യവസായ വകുപ്പ് എം എസ് എം ഇ ഇൻഷുറൻസ് പദ്ധതി ആവിഷ്കരിച്ചു.

(3) ഒരു കുടുംബം ഒരു സംരംഭം പദ്ധതി (One Family One Enterprise OFOE)
ഓരോ കുടുംബത്തിലും സൂക്ഷ്മ സംരംഭങ്ങൾ പ്രോത്സാഹിപ്പിക്കുന്നതിനും പ്രത്യേകിച്ച് വനിതാ സംരംഭങ്ങൾ പ്രോത്സാഹിപ്പിക്കുന്നതിനും വേണ്ടി ആവിഷ്കരിച്ചിരിക്കുന്ന പദ്ധതിയാണ് ഒരു കുടുംബം ഒരു സംരംഭം പദ്ധതി.

(4) ഒരു തദ്ദേശസ്ഥാപനം ഒരു ഉൽപ്പന്നം (One Local Body One Product)
ഒരു തദ്ദേശസ്ഥാപനങ്ങളിൽ ഉള്ള വിഭവങ്ങൾ ഉപയോഗപ്പെടുത്തി പ്രദേശത്തിന് അനുയോജ്യമായ ഉൽപ്പന്നങ്ങൾ നിർമ്മിക്കുകയും പ്രാദേശിക ഉത്പാദനകേന്ദ്രങ്ങളെ ആഗോള വിപണന കേന്ദ്രങ്ങളുമായി ബന്ധപ്പെടുത്തുന്നതിനും ഒരു തദ്ദേശസ്ഥാപനം ഒരു ഉൽപ്പന്നം പദ്ധതി സംസ്ഥാന വ്യവസായ വകുപ്പ് ആവിഷ്കരിച്ചു.

 

(5) കെ-സ്വിഫ്റ്റ് (K-SWIFT)
സംസ്ഥാനത്ത് വ്യവസായ സൗഹൃദ അന്തരീക്ഷം സൃഷ്ടിക്കുന്നതിന് വേണ്ടി ആവിഷ്കരിച്ച ഏകജാലക സംവിധാനമാണ് കെ- സ്വിഫ്റ്റ്. സംസ്ഥാന സർക്കാരിന്റെ നിയന്ത്രണത്തിലുള്ള 21 ഏജൻസികളെ കോർത്തിണക്കി കൊണ്ടുള്ള വളരെ വേഗത്തിലുള്ളതും സുതാര്യമായതുമായ ഓൺലൈൻ സംവിധാനമാണിത്. മുൻകൂർ ലൈസൻസ് ഇല്ലാതെയും കെട്ടിട നമ്പർ ലഭിക്കാതെയും മൂന്നുവർഷം വരെ സംരംഭം നടത്തുന്നതിന് കെ- സ്വിഫ്റ്റ് അക്നോളഡ്ജ്മെന്റ് സർട്ടിഫിക്കറ്റ് സംരംഭകന് ഉപയോഗപ്പെടുത്താവുന്നതാണ്. കൂടുതൽ നിക്ഷേപം ആവശ്യമില്ലാത്തതും വൈദ്യുതി ഉപയോഗം കുറവുള്ളതും മലിനീകരണ ബോർഡിന്റെ ചുവപ്പ് വിഭാഗത്തിൽ ഉൾപ്പെടാത്തതുമായ സംരംഭങ്ങൾ ഈ സർട്ടിഫിക്കറ്റിന്റെ സഹായത്തോടെ ആരംഭിക്കാവുന്നതാണ്.

(6) എം. എസ്. എം. ഇ ഫെസിലിറ്റേഷൻ നിയമം 2019 ഭേദഗതി
ഈസ് ഓഫ് ഡൂയിങ്ങ് ബിസിനസ്സിന്റെ ഭാഗമായി സംസ്ഥാനത്ത് സംരംഭങ്ങൾക്ക് അനുയോജ്യമായ ആവാസ വ്യവസ്ഥ സൃഷ്ടിക്കുന്നതിനു വേണ്ടി കേരള നിയമസഭ 2019-ലെ എം. എസ്. എം. ഇ ഫെസിലിറ്റേഷൻ നിയമം ഭേദഗതി ചെയ്തു. സംസ്ഥാനത്ത് എം. എസ്. എം. ഇ കൾ സ്ഥാപിക്കുന്നതിനും പ്രവർത്തിപ്പിക്കുന്നതിനും ആവശ്യമായ ചില അംഗീകാരങ്ങളിൽ നിന്നും പരിശോധനകളിൽ നിന്നും ഒഴിവാക്കുക എന്നതാണ് ഈ ഭേദഗതിയുടെ പ്രധാന ലക്ഷ്യം. ഇത് എം. എസ്. എം. ഇ കളുടെ വളർച്ചയെ ത്വരിതപ്പെടുത്തിയിട്ടുണ്ട്.

എം. എസ്. എം. ഇ കൾക്ക് പദ്ധതിയുടെ പെരുമഴക്കാലം
I കേന്ദ്ര ബഡ്ജറ്റ് (Union Budget)
(1) നിർവചനം
2025 ഫെബ്രുവരി രണ്ടിന് കേന്ദ്ര ധനകാര്യ മന്ത്രി അവതരിപ്പിച്ച ബഡ്ജറ്റിൽ എം. എസ്. എം. ഇ കൾക്ക് പുതിയ വർഗ്ഗീകരണം 2025 ഏപ്രിൽ 1 മുതൽ പ്രാബല്യത്തിൽ വരുന്നതാണ്.

തരം	നിക്ഷേപം	വാർഷിക വിൽപന
സൂക്ഷ്മം	2.5 കോടി	10 കോടി
ചെറുകിടം	25 കോടി	100 കോടി
ഇടത്തരം	125 കോടി	500 കോടി

(2) ക്രെഡിറ്റ് ഗ്യാരണ്ടി ട്രസ്റ്റ് ഫണ്ട് ഫോർ എം. എസ്. എം. ഇ (CGTMSME)
നിലവിൽ സംരംഭകർക്ക് ലഭിക്കുന്ന കൊളാറ്ററൽ ഫ്രീ ലോൺ അഞ്ചു കോടി രൂപയിൽ നിന്നും 2025 ഏപ്രിൽ ഒന്നു മുതൽ പത്തു കോടിയായി വർധിപ്പിച്ചു.

(3) എം എസ് എം ഇ ക്രെഡിറ്റ് കാർഡ്
എം. എസ്. എം. ഇ പ്രവർത്തന മൂലധനം ഉൾപ്പെടെയുള്ള ആവശ്യങ്ങൾക്ക് വിനിയോഗിക്കുന്നതിന് വേണ്ടി 5 ലക്ഷം രൂപ വരെ പരിധിയിലുള്ള ക്രെഡിറ്റ് കാർഡ് സമ്പ്രദായം 2025 ഏപ്രിൽ ഒന്നു മുതൽ നിലവിൽ വരുന്നതാണ്. ആദ്യവർഷം 10 ലക്ഷം സംരംഭകർക്ക് ഇതിന്റെ പ്രയോജനം ലഭിക്കുമെന്ന് പ്രതീക്ഷിക്കുന്നു.

(4) കാലാവധി വായ്പ (Term Loan)
വനിത – പട്ടികജാതി -പട്ടികവർഗ്ഗ സംരംഭകത്വം (Women-SC/ST Entrepreneurship) പ്രോത്സാഹിപ്പിക്കുന്നതിന് വേണ്ടി രണ്ടുകോടി രൂപ വരെ കാലാവധി വായ്പ അനുവദിക്കുന്നതാണ്. ഈ വിഭാഗത്തിൽ ഉൾപ്പെട്ട അഞ്ച് ലക്ഷം പുതിയ സംരംഭകർക്ക് ഇതിന്റെ പ്രയോജനം ലഭിക്കുന്നതാണ്.

(5) നാഷണൽ മാനുഫാക്ചറിംഗ് മിഷൻ
എം എസ് എം ഇ കളെ മേക്ക് ഇൻ ഇന്ത്യ പദ്ധതിയുടെ ഭാഗമായി പിന്തുണയ്ക്കുന്നതിനും പ്രോത്സാഹിപ്പിക്കുന്നതിനും വേണ്ടി ഒരു നാഷണൽ മാനുഫാക്ചറിംഗ് മിഷൻ രൂപീകരിക്കുന്നതാണ്. ഹരിത വ്യവസായങ്ങളായ സോളാർ സെൽ, ഇലക്ട്രിക് വാഹനം, ബാറ്ററി മുതലായവയ്ക്ക് പ്രാമുഖ്യം നൽകുന്നതാണ്.

(6) സ്റ്റാർട്ടപ്പ് പദ്ധതി (Support for Startups)
സ്റ്റാർട്ടപ്പ് പദ്ധതികളെ സഹായിക്കുന്നതിന് വേണ്ടി 10,000 കോടിയുടെ ഒരു പുതിയ ഫണ്ട്സ് ഓഫ് ഫണ്ട്സ് രൂപീകരിക്കുന്നതാണ്

(7) എം എസ് എം ഇ എക്സ്പോർട്ടേഴ്സ്
എം. എസ്. എം. ഇ കയറ്റുമതിക്കാരെ പ്രോത്സാഹിപ്പിക്കുന്നതിന് വേണ്ടി 20 കോടി രൂപ വരെ 2025 – 26 ബഡ്ജറ്റിൽ പ്രഖ്യാപിച്ചിട്ടുണ്ട്.

സംസ്ഥാന ബഡ്ജറ്റും വ്യവസായ മേഖലയും (State Budget and Industrial Sector)
2025 – 26 ലെ കേന്ദ്ര ബഡ്ജറ്റിൽ പ്രഖ്യാപിച്ച വായ്പ പദ്ധതികൾ ക്രെഡിറ്റ് ഗ്യാരന്റി സ്കീം, എം എസ് എം ഇ ക്രെഡിറ്റ് കാർഡ് മുതലായവയെല്ലാം സംസ്ഥാന സർക്കാർ പദ്ധതികളോടൊപ്പം സമന്വയിപ്പിച്ച് ആവിഷ്കരിച്ച് നടപ്പാക്കുന്നതാണ്. 2025- 26 ലെ ബഡ്ജറ്റിൽ വ്യവസായ മേഖലയ്ക്കുള്ള വിഹിതം 1831.36 കോടിയാണ്. സ്റ്റാർട്ടപ്പ്, നാനോ സംരംഭങ്ങൾ, സ്വകാര്യ വ്യവസായ പാർക്ക്, ബഹുനില വ്യവസായ എസ്റ്റേറ്റ്, രോഗാവസ്ഥയിലുള്ള സംരംഭങ്ങളുടെ പുനരുദ്ധാരണം, പരമ്പരാഗത വ്യവസായങ്ങൾ, സംരംഭകത്വ ബോധവൽക്കരണ പ്രോത്സാഹന പദ്ധതികൾ, സംരംഭക സംഗമ പദ്ധതികൾ മുതലായവയെല്ലാം 2025-26 സംസ്ഥാന ബഡ്ജറ്റിൽ ഉൾപ്പെടുത്തിയിട്ടുണ്ട്. വ്യവസായ ഇടനാഴി പദ്ധതികളും, കണക്റ്റിവിറ്റി പദ്ധതികളും, ഹരിത വ്യവസായ പ്രോത്സാഹന പദ്ധതികളും എം. എസ്. എം. ഇ മേഖലയുടെ വളർച്ചയെ ത്വരിതപ്പെടുത്തുന്നു.

ഇൻവെസ്റ്റ് കേരള ആഗോള നിക്ഷേപക സംഗമം (Invest Kerala Global Investors Meet)
കേരളത്തിന്റെ ചെറുകിട – സൂക്ഷ്മ – ഇടത്തരം സംരംഭങ്ങളുടെ വളർച്ചയ്ക്കും 2025 ഫെബ്രുവരി 21, 22 തീയതികളിൽ കൊച്ചിയിൽ നടന്ന ആഗോള നിക്ഷേപ ഉച്ചകോടി സഹായകരമാകും. 26 വിദേശ രാജ്യങ്ങളിൽ നിന്ന് ഉൾപ്പെടെ 3000 സംരംഭകരാണ് ഈ ഉച്ചകോടിയിൽ പങ്കെടുത്തത്. സംസ്ഥാനത്തിന്റെ വ്യവസായ ചരിത്രത്തിൽ രേഖപ്പെടുത്തുന്ന ഒരു മഹാസംഭവമായി ഈ ഉച്ചകോടി മാറുന്നതാണ്. ഇൻവെസ്റ്റ് കേരള ആഗോളനിക്ഷേപക സംഗമത്തിൽ 1,52,905 കോടിയുടെ നിക്ഷേപത്തിനുള്ള താൽപര്യപത്രം (Expression of Interest – EOI) 374 കമ്പനികൾ ഒപ്പുവച്ചു. ഐ ടി മേഖല ഉൾപ്പെടെയുള്ള കമ്പനികൾ പുതിയ വ്യവസായങ്ങൾ ആരംഭിക്കുന്നതിന് മുന്നോട്ട് വന്നിട്ടുണ്ട്. വൻകിട കമ്പനികൾക്കൊപ്പം അവയ്ക്ക് ആവശ്യമായ അനുബന്ധ ഉപകരണങ്ങൾ/ ഉൽപ്പന്നങ്ങൾ നിർമ്മിക്കുന്ന സൂക്ഷ്മ – ചെറുകിട – ഇടത്തരം സംരംഭ മേഖലയിലും നിക്ഷേപവും തൊഴിലവസരങ്ങളും വർദ്ധിക്കുന്നതാണ്. ഉത്തരവാദിത്ത നിക്ഷേപം, ഉത്തരവാദിത്വ വ്യവസായം എന്നീ മേഖലകളെ ശ്രദ്ധ കേന്ദ്രമാക്കി കേരളത്തിലേക്ക് കൂടുതൽ നിക്ഷേപം ആകർഷിച്ച് തൊഴിൽ മേഖലയെ ശക്തമാക്കുവാൻ നിക്ഷേപക ഉച്ചകോടി സഹായകരമാകുമെന്ന് പ്രതീക്ഷിക്കാവുന്നതാണ്. കേന്ദ്രസഹായത്തോടുകൂടി റോഡ് കണക്ടിവിറ്റി, അന്താരാഷ്ട്ര പദവിയോട് കൂടിയുള്ള തുറമുഖ വികസനം, വ്യവസായി ഇടനാഴികൾ സജ്ജമാക്കൽ എന്നീ പദ്ധതികളുടെ പൂർത്തീകരണത്തോടെ കേരളം വികസന മാതൃകയിൽ ലോകത്തിന്റെ ശ്രദ്ധ കേന്ദ്രമായി മാറുന്നതാണ്.

(മുൻ വ്യവസായ വകുപ്പ് ഡെപ്യൂട്ടി ഡയറക്ടറാണ് ലേഖകൻ)
Sources of Data:
1. MSME, Ministry, GoI
2. MSME EDI, Thrissur
3. Kerala Economic Review