പ്രധാനമന്ത്രി ഫോർമലൈസേഷൻ ഓഫ് മൈക്രോ ഫുഡ് പ്രോസസിംഗ് എന്റർപ്രൈസസ് (പിഎംഎഫ്എംഇ) പദ്ധതി
ശ്രീ. എസ്. ഹരികിഷോർ ഐ.എ.എസ്
ഡയറക്ടർ, വ്യവസായ വാണിജ്യ വകുപ്പ്‌
കേന്ദ്ര സർക്കാരിന്റെ ഭക്ഷ്യ സംസ്‌കരണ വ്യവസായ മന്ത്രാലയം, ആത്മ നിർഭർ ഭാരത് അഭിയാന്റെ ഭാഗമായി സംസ്ഥാനങ്ങളുമായി സഹകരിച്ച് ഭക്ഷ്യ സംസ്‌കരണ മേഖലയിലെ സംരംഭങ്ങളുടെ ഉന്നമനം ലക്ഷ്യമിട്ട് സാമ്പത്തിക, സാങ്കേതിക, വിപണന പിന്തുണ നൽകുന്നതിനായി രൂപവത്കരിച്ച കേന്ദ്രാവിഷ്‌കൃത പദ്ധതിയാണ് പ്രധാൻമന്ത്രി ഭക്ഷ്യ സംസ്‌കരണ സംരംഭ രൂപവൽക്കരണ പദ്ധതി (പി.എം.എഫ്.എം.ഇ സ്‌കീം). ഈ പദ്ധതിയിലൂടെ സൂക്ഷ്മ ഭക്ഷ്യ സംസ്‌കരണ സംരംഭങ്ങൾക്കു സാമ്പത്തിക, സാങ്കേതിക, ബിസിനസ്സ് പിന്തുണ ലഭിക്കുന്നതാണ്.
2020-21 മുതൽ 2024-25 വരെയുള്ള അഞ്ച് സാമ്പത്തിക വർഷ കാലയളവിൽ 10,000 കോടി രൂപയാണ് പദ്ധതി വിഭാവനം ചെയ്യുന്നത്. കേന്ദ്ര സർക്കാർ സംസ്ഥാന സർക്കാരുമായി സഹകരിച്ച് 60:40 എന്ന അനുപാതത്തിലാണ് പദ്ധതി നടപ്പാക്കുന്നത്. ഭക്ഷ്യ സംസ്‌കരണ മേഖലയിലെ സംരംഭങ്ങൾക്ക് GST, FSSAI ശുചിത്വ മാനദണ്ഡങ്ങൾ, ഉദ്യോഗ് ആധാർ എന്നിവയ്ക്കുള്ള രജിസ്‌ട്രേഷനോടൊപ്പം നവീകരണത്തിനുള്ള മൂലധന നിക്ഷേപങ്ങളെ പിന്തുണക്കുന്നതിനും പിഎംഎഫ്എംഇ പദ്ധതി ലക്ഷ്യമിടുന്നു; കൂടാതെ നൈപുണ്യ പരിശീലനം, ഭക്ഷ്യ സുരക്ഷ, ശുചിത്വ നിലവാരം, ഗുണനിലവാരം മെച്ചപ്പെടുത്തൽ, ഡിപിആർ തയ്യാറാക്കുന്നതിനും, ബാങ്ക് ലോൺ ലഭ്യമാക്കൽ നവീകരണത്തിനുള്ള പിന്തുണ എന്നിവയെ കുറിച്ചുള്ള സാങ്കേതിക പരിജ്ഞാനവും പദ്ധതിയിലൂടെ ഉറപ്പാക്കുന്നു.
ഭക്ഷ്യ സംസ്‌കരണ സൗകര്യങ്ങൾ നവീകരിക്കുന്നതിന് വ്യക്തിഗത യൂണിറ്റുകൾ, ഗ്രൂപ്പ് വിഭാഗത്തിൽ ഫാർമർ പ്രൊഡ്യൂസ് ഓർഗനൈസേഷനുകൾ (എഫ്.പി.ഒ.കൾ) / സഹകരണ സ്ഥാപനങ്ങൾ / സർക്കാരിതര ഓർഗനൈസേഷൻ (എൻജിഒ) / സ്വയം സഹായ സംഘം (എസ്എച്ച്ജി) / പ്രൈവറ്റ് ലിമിറ്റഡ് കമ്പനികൾ എന്നിവയ്ക്ക് പൊതു അടിസ്ഥാന സൗകര്യങ്ങൾ സജ്ജീകരിക്കുന്നതിനും, പ്രൊഡ്യൂസേഴ്‌സ് കോ ഓപ്പറേറ്റീവുകൾക്ക് സാമ്പത്തിക സഹായം നൽകുക, ജി.എസ്.ടി., ഉദ്യോഗ് ആധാർ, എഫ്എസ്എസ്എഐ രജിസ്‌ട്രേഷനുകൾ വഴി സൂക്ഷ്മ ഭക്ഷ്യ സംസ്‌കരണ യൂണിറ്റുകളുടെ രജിസ്‌ട്രേഷൻ നൽകുക, ബാങ്ക് വായ്പകൾ ലഭ്യമാക്കുന്നതിനും വിശദമായ പ്രോജക്ട് റിപ്പോർട്ടുകൾ (DPR) തയ്യാറാക്കുന്നതിനുമുള്ള പിന്തുണയും സഹായവും നൽകുക, പരിശീലനങ്ങളിലൂടെയും സാങ്കേതിക പരിജ്ഞാനത്തിലൂടെയും ഗുണമേന്മ മെച്ചപ്പെടുത്തലും നൈപുണ്യ വികസനവും നടപ്പിലാക്കുക, എഫ്.പി.ഒ. കൾ, എസ്എച്ച്ജി കൾ, പ്രൊഡ്യൂസർ കോഓപ്പറേറ്റീവുകൾ എന്നിവയ്ക്ക് ബ്രാൻഡിംഗും വിപണന പിന്തുണയും നൽകുക തുടങ്ങിയവയാണ് പദ്ധതിയുടെ മുഖ്യ ലക്ഷ്യങ്ങൾ.
വ്യക്തിഗത വിഭാഗത്തിന് സാമ്പത്തിക സഹായം എന്ന നിലയിൽ സൂക്ഷ്മ ഭക്ഷ്യ സംസ്‌കരണ സംരംഭങ്ങൾ/ പ്രൊപ്രൈറ്റർഷിപ്പ് സ്ഥാപനങ്ങൾ / പാർട്ണർഷിപ്പ് സ്ഥാപനങ്ങൾ – യൂണിറ്റിന് പരമാവധി 10 ലക്ഷം രൂപ വരെ യോഗ്യതയുള്ള പ്രോജക്റ്റ് ചെലവിന്റെ 35% ക്രെഡിറ്റ് ലിങ്ക്ഡ് ഗ്രാന്റ് (ഗുണഭോക്തൃ വിഹിതം പ്രോജക്റ്റ് ചെലവിന്റെ 10% ആണ്, ബാക്കി ബാങ്കിൽ നിന്നുള്ള വായ്പയാണ്) ലഭ്യമാക്കുന്നു.
ഗ്രൂപ്പ് വിഭാഗത്തിനുള്ള സാമ്പത്തിക സഹായം എന്ന നിലയിൽ ഫാർമർ പ്രൊഡ്യൂസ് ഓർഗനൈസേഷനുകൾ (എഫ്.പി.ഒ.കൾ) / സഹകരണ സ്ഥാപനങ്ങൾ / സർക്കാരിതര ഓർഗനൈസേഷൻ (എൻജിഒ) / സ്വയം സഹായ സംഘം (എസ്എച്ച്ജി) / പ്രൈവറ്റ് ലിമിറ്റഡ് കമ്പനികൾ എന്നിവയ്ക്ക് ക്രെഡിറ്റ് ലിങ്കേജിനൊപ്പം 35% ഗ്രാന്റ് ലഭ്യമാക്കുന്നു.
സ്വയം സഹായ സംഘങ്ങളിലെ അംഗങ്ങൾക്ക് മൂലധനം എന്ന നിലയിൽ പ്രവർത്തന മൂലധനത്തിനും ഭക്ഷ്യ സംസ്‌കരണ പ്രവർത്തനങ്ങളിൽ ഏർപ്പെട്ടിരിക്കുന്ന അംഗങ്ങൾക്ക് ചെറിയ ഉപകരണങ്ങൾ വാങ്ങുന്നതിനായി പരമാവധി തുക 40,000/ രൂപ ലഭ്യമാക്കുന്നു. വ്യക്തിഗത SHG അംഗത്തിനുള്ള പിന്തുണ 35% ക്രെഡിറ്റ് ലിങ്ക്ഡ് ഗ്രാന്റ് പരമാവധി തുക 10 ലക്ഷം രൂപ ലഭ്യമാക്കുക എന്നിവയാണ് ഈ പദ്ധതി മുഖേന ലഭ്യമാക്കുന്ന ആനുകൂല്യങ്ങൾ.