വ്യവസായ കേരളം മാറുന്നു

 

സേതുമാധവനും അദ്ദേഹത്തിന്റെ ദാക്ഷായണി ബിസ്ക്കറ്റും ഇനി വെറും കഥ മാത്രം. 1993-ൽ പ്രിയദർശൻ സംവിധാനം ചെയ്ത മിഥുനം എന്ന സിനിമയിൽ മോഹൻലാൽ വേഷപ്പകർച്ച നൽകിയ സേതുമാധവൻ എന്ന കഥാപാത്രവും അദ്ദേഹത്തിന്റെ ദാക്ഷായണി ബിസ്കറ്റും ഇന്നൊരു പഴങ്കഥയാണ്. കേരളത്തെ സംരംഭങ്ങൾ തുടങ്ങാൻ ഏറ്റവും അനുകൂലമായതും സൗഹൃദവുമായ ഒരു ഇടമാക്കി മാറ്റുന്നതിനുള്ള പദ്ധതികളും സേവനങ്ങളും നിയമങ്ങളും ചട്ടങ്ങളും നടപ്പിലാക്കുക എന്നതാണ് സംസ്ഥാന വ്യവസായ വകുപ്പിന്റെ ലക്ഷ്യം. കേരളത്തെ നിക്ഷേപ സൗഹൃദമാക്കി മാറ്റുന്നതിനുള്ള സംസ്ഥാന സർക്കാരിന്റെ ഇടപെടലുകൾ ഊർജിതമായി നടപ്പിലാക്കി കൊണ്ടിരിക്കുന്നു. ഇന്ത്യയുടെ വ്യവസായ ഭൂപടത്തിൽ കേരളത്തിന്റെ സ്ഥാനം അടയാളപ്പെടുത്തിയിരിക്കുന്നു. വ്യവസായ സൗഹൃദ സംസ്ഥാനങ്ങളുടെ പട്ടികയിൽ കേരളത്തിന്റെ സ്ഥാനം 28- ൽ നിന്ന് 15-ാം റാങ്കിലേക്ക് ഉയർന്നിരിക്കുന്നു. സംരംഭങ്ങൾ ആരംഭിക്കുന്നതിന് അനുമതി നൽകുന്നതുമായി ബന്ധപ്പെട്ടുള്ള നിയമങ്ങളിലും ചട്ടങ്ങളിലും കാലാനുസൃതമായ മാറ്റങ്ങൾ കൊണ്ടുവന്നതും നയപരമായ തീരുമാനങ്ങൾ എടുത്ത് നടപ്പിലാക്കിയതും ആണ് കേരളത്തിന്റെ ഈ നേട്ടത്തിന് അടിസ്ഥാനം. ‘ഈസ് ഓഫ് ഡൂയിങ് ബിസിനസ്’ (EODB) സൂചികയിൽ ഇന്ത്യയിലെ മികച്ച 10 സംസ്ഥാനങ്ങളിൽ ഒന്നാണ് കേരളം.

 

ഈസ് ഓഫ് ഡൂയിങ് ബിസിനസ് എന്താണ്? 

ലോകബാങ്ക് ഗ്രൂപ്പ് സ്ഥാപിച്ചിരിക്കുന്ന ഒരു റാങ്കിംഗ് സൂചകമാണ് ഈസ് ഓഫ് ഡൂയിങ് ബിസിനസ് (EODB). ഉയർന്ന റാങ്ക് എന്നാൽ സംഖ്യാപരമായി കുറഞ്ഞ മൂല്യമുള്ള ഒരു സംഖ്യയാണ് സൂചിപ്പിക്കുന്നത്. ഉയർന്ന് റാങ്കിങ്ങ് എന്നാൽ ഏറ്റവും നല്ലതും ലളിതവുമായ നിയമങ്ങളും ചട്ടങ്ങളും നിയന്ത്രണങ്ങളോടൊപ്പം ബിസിനസിന്റെ സ്വത്തവകാശങ്ങൾ സംരക്ഷിക്കുന്നതിനുള്ള ശക്തമായ പിന്തുണയുമാണ്. ബിസിനസ് റിഫോം ആക്ഷൻ പ്ലാൻ (ബി. ആർ. എ. പി) എന്ന പേരിൽ ഓരോ വർഷവും സംസ്ഥാനങ്ങൾ നടപ്പാക്കേണ്ട കാര്യങ്ങൾ കേന്ദ്ര സർക്കാരിന്റെ ഡിപ്പാർട്ട്മെന്റ് ഫോർ പ്രൊമോഷൻ ഓഫ് ഇന്ത്യൻ ഇൻഡസ്ട്രി ആന്റ് ഇന്ത്യൻ ഇന്റേണൽ ട്രേഡ് (KSIDC) നമ്പർ നൽകി വരുന്നു. ഈ ആക്ഷൻ പ്ലാനിലെ മാനദണ്ഡങ്ങൾ നടപ്പിലാക്കുന്നതിന്റെ അടിസ്ഥാനത്തിലാണ് വ്യവസായ സൗഹൃദ സൂചിക തയ്യാറാക്കുന്നത്. 2016 മുതലാണ് ഈസ് ഓഫ് ഡൂയിങ് ബിസിനസ് പരിഷ്കാരങ്ങൾ നടപ്പിലാക്കുന്നതിന് കേരളത്തിൽ നടപടികൾ തുടങ്ങിയത്. ഇതിനായി കേരള സംസ്ഥാന വ്യവസായ വികസന കോർപറേഷൻ (KSIDC) നോഡൽ ഏജൻസിയായി പ്രവർത്തിക്കുന്നു. വിദ്യാർത്ഥി സംരംഭകത്വം, ഒരു വീട്ടിൽ ഒരു സംരംഭം തുടങ്ങിയ എല്ലാ വിഭാഗത്തിലുൾപ്പെട്ടവരും സംരംഭകരാകുന്നതിനുള്ള എല്ലാ പിന്തുണയും സംസ്ഥാന വ്യവസായ വകുപ്പ് നൽകി വരുന്നു. പുതിയ സംരംഭങ്ങൾ ആരംഭിക്കുന്നതിനു വേണ്ടി 2022-ൽ സംരംഭക വർഷം പദ്ധതി നടപ്പിലാക്കിയതും 2023-ൽ നിലവിലുള്ള സംരംഭങ്ങളെ സുസ്ഥിരമായി നിലനിർത്തുന്നതിനുവേണ്ടി സംരംഭക വർഷം 2.0 നടപ്പിലാക്കിയതും കേരളത്തെ നിക്ഷേപ സൗഹൃദമാക്കി മാറ്റുന്നതിന്റെ ഭാഗമായിട്ടാണ്. 

 

കേരളത്തെ കൂടുതൽ നിക്ഷേപ സൗഹൃദമാക്കുന്നതിനും അതുവഴി വ്യവസായ സൗഹൃദ അന്തരീക്ഷം കൂടുതൽ മെച്ചപ്പെടുത്തുന്നതിനും വേണ്ടി സംസ്ഥാന സർക്കാർ ഊർജ്ജിതമായ ഇടപെടലുകളാണ് നടത്തിക്കൊണ്ടിരിക്കുന്നത്. 

 

(1) 2018- ലെ കേരള നിക്ഷേപം പ്രോത്സാഹിപ്പിക്കലും സുഗമമാക്കലും നിയമം

      [Kerala Investment Promotion and Facilitation Act-2018]

സംരംഭങ്ങളുടെ സുഗമമായ നടത്തിപ്പിനുവേണ്ടി 7 നിയമങ്ങളിലും 10 ചട്ടങ്ങളിലും സംസ്ഥാന സർക്കാർ ഭേദഗതി വരുത്തിയിട്ടുണ്ട്. അതനുസരിച്ച് സംസ്ഥാനത്ത് വ്യവസായം തുടങ്ങുന്നതിന് അനുമതി നൽകുന്നതിനുള്ള നടപടിക്രമങ്ങൾ ലഘൂകരിക്കുന്നതിന് കേരള പഞ്ചായത്ത് രാജ് നിയമം, കേരള പഞ്ചായത്ത് കെട്ടിട നിർമ്മാണ ചട്ടങ്ങൾ, കേരള മുൻസിപ്പൽ കെട്ടിട നിർമ്മാണ ചട്ടങ്ങൾ എന്നിവയിൽ പ്രധാനപ്പെട്ട ഭേദഗതികൾ വരുത്തിയിട്ടുണ്ട്. (സർക്കുലർ 75/ആർഡി3/2019/തസ്വഭവ തീയതി 29/03/19) 2018-ലെ നിയമത്തിലൂടെ സംരംഭങ്ങൾ ആരംഭിക്കുതിനുള്ള ലൈസൻസിങ്ങ് സമ്പ്രദായത്തിൽ സമൂലമായ ഭേദഗതികൾ കൊണ്ടുവന്നു. മുൻകൂർ ലൈസൻസുകൾ കരസ്ഥാമാക്കാതെ തന്നെ സംരംഭങ്ങൾ ആരംഭിക്കുന്നതിനുള്ള വ്യവസ്ഥകൾ ഈ നിയമത്തിലുണ്ട്. വളരെ വേഗത്തിൽ (30 ദിവസത്തിനുള്ളിൽ) സംരംഭങ്ങൾ തുടങ്ങുന്നതിനുള്ള അനുമതി ഈ നിയമപ്രകാരം ലഭ്യമാണ്. ഫാക്ടറികൾ, വ്യാപാരങ്ങൾ, സംരംഭകത്വ പ്രവർത്തനങ്ങൾ മറ്റ് സേവനങ്ങൾക്കുള്ള ലൈസൻസ് എന്ന പുതിയ നാമധേയത്തിലാണ് ലൈസൻസ് നൽകുന്നത്. 

 

(2) 2019-ലെ കേരള സൂക്ഷ്മ- ചെറുകിട- ഇടത്തരം- സംരംഭ ഫെസിലിറ്റേഷൻ ആക്ട്

   [Kerala Micro – Small-Medium Enterprise Facilitation Act 2019]

ബാങ്ക് വായ്പ എടുത്തിട്ട് സംരംഭങ്ങൾ ആരംഭിക്കുന്നതിന് തദ്ദേശ സ്വയം ഭരണ ലൈസൻസ് കിട്ടുന്നതിന് സംരംഭകർ ദീർഘനാൾ കാത്തിരിക്കുന്ന ഒരു കാലഘട്ടമുണ്ടായിരുന്നു. സംരംഭങ്ങൾ ആരംഭിക്കാൻ കഴിയാത്തതുകൊണ്ട് ബാങ്കിൽ നിന്നും എടുത്ത വായ്പ തിരിച്ചടവ് നടത്താൻ കഴിയാത്ത സാഹചര്യമുണ്ടായിരുന്നു. ഇക്കാരണത്താൽ സംരംഭം തുടങ്ങുക എന്ന സ്വപ്നം പലർക്കും പാതി വഴിയ്ക്ക് ഉപേക്ഷിക്കേണ്ടി വന്നു. സംരംഭകരുടെ ഈ ദുരവസ്ഥ പരിഹരിക്കുന്നതിനുവേണ്ടിയാണ് 2019- മുതൽ സംസ്ഥാന സർക്കാർ കെ- സ്വിഫ്റ്റ് (K-Swift) എന്ന ഓൺലൈൻ സംവിധാനത്തിന് തുടക്കം കുറിച്ചത്. സംസ്ഥാനത്ത് വ്യവസായ സൗഹൃദ അന്തരീക്ഷം സൃഷ്ടിക്കുകയെന്നതാണ് കെ- സ്വിഫ്റ്റ് (K-Swift – Kerala Single Window Interface For Fast and Transparent Clearance) എന്ന ഓൺലൈൻ സംവിധാനം നടപ്പിലാക്കിയതിലൂടെ സർക്കാർ ലക്ഷ്യം വയ്ക്കുന്നത്. സംരംഭകർക്ക് വേണ്ട അനുമതികൾ (Clearance) സമയബന്ധിതമായി നൽകുന്നതിനുവേണ്ടി സംസ്ഥാന സർക്കാരിന്റെ നിയന്ത്രണത്തിലുള്ള 21 വകുപ്പുകളെയും ഏജൻസികളെയും ഏകോപിപ്പിച്ച് കൊണ്ടുള്ള വേഗതയേറിയതും സുതാര്യവുമായ ഏകജാലക സംവിധാനമാണ് (Single Window Clearance System) കെ- സ്വിഫ്റ്റ്. കേരളത്തിലേയ്ക്ക് കൂടുതൽ നിക്ഷേപം ആകർഷിക്കുന്നതിനും അതുവഴി കേരളം കൂടുതൽ വ്യവസായ സൗഹൃദമാക്കുന്നതിനും ഈ ഏകജാലക സംവിധാനത്തിലൂടെ കഴിഞ്ഞിട്ടുണ്ട്. ഭൂമിശാസ്ത്രപരമായി കേരളത്തിന് അനുയോജ്യമായത് സൂക്ഷ്മ- ചെറുകിട- ഇടത്തരം സംരംഭങ്ങളാണ്. ഈ തരത്തിലുള്ള കൂടുതൽ സംരംഭങ്ങൾക്ക് ആരംഭം കുറിക്കുന്നതിന് കെ- സ്വിഫ്റ്റിലൂടെ കഴിഞ്ഞിട്ടുണ്ട്. 

 

 

പുതിയതായി ആരംഭിക്കുന്നതും മലിനീകരണ ബോർഡിന്റെ റെഡ് വിഭാഗത്തിൽ ഉൾപെടാത്തതുമായ സൂക്ഷ്മ- ചെറുകിട- ഇടത്തരം സംരംഭങ്ങൾക്ക് കെ- സ്വിഫ്റ്റ് വഴി അക്നോളജ്മെന്റ് എടുക്കാം. നെൽവയൽ- തണ്ണീർതട നിയമപ്രകാരം തടസ്സമുള്ള സ്ഥലത്ത് ആരംഭിക്കുന്ന സംരംഭങ്ങൾ, 2016-ലെ കേരള- നഗര- ഗ്രാമാസൂത്രണ നിയമപ്രകാരം വിജ്ഞാപനം ചെയ്തിട്ടുള്ള മാസ്റ്റർ പ്ലാനിൽ ഉൾപ്പെട്ടിട്ടുള്ള ഭൂമി വിനിയോഗിച്ച് ആരംഭിക്കുന്ന സംരംഭങ്ങൾക്ക് കെ-സ്വിഫ്റ്റിന് അർഹതയുണ്ടായിരിക്കുകയില്ല. 10 കോടിയിൽ താഴെ നിക്ഷേപമുള്ളതും മലിനീകരണ ബോർഡിന്റെ ചുവപ്പ് വിഭാഗത്തിൽ ഉൾപ്പെടാത്തതുമായ സംരംഭങ്ങൾ മുൻകൂർ ലൈസൻസില്ലാതെ ആരംഭിക്കാവുന്നതാണ്. 

 

[K-Swift and Building Number]

2019- ലെ നിയമപ്രകാരം 50 കോടി വരെ നിക്ഷേപമുള്ള സംരംഭങ്ങൾക്ക് മുൻകൂർ കെട്ടിട നമ്പർ ഇല്ലാതെ തന്നെ സംരംഭത്തിന് തുടക്കം കുറിക്കാവുന്നതാണ്. കെ-സ്വിഫ്റ്റ് വഴി അപേക്ഷ നൽകുമ്പോൾ ലഭിക്കുന്ന കെ-സ്വിഫ്റ്റ് നമ്പരിനെ 3 വർഷത്തേയ്ക്ക് താൽക്കാലിക കെട്ടിട നമ്പർ (Temporary Building Number) ആയി പരിഗണിക്കാവുന്നതാണ്. (സ: ഉ. (അച്ചടി) നമ്പർ 59/2023/വ്യവ. തീയതി 01-11-2023)

 

മുകളിൽ പ്രതിപാദിച്ചത് കൂടാതെ പങ്കാളിത്ത സ്ഥാപനങ്ങൾ/ പ്രൈവറ്റ് ലിമിറ്റഡ് കമ്പനികൾക്ക് അവരുടെ കമ്പനിയുടെ പാൻകാർഡ് വേണം.

 

(Through Application Form CAF)

(3) 2021- ലെ കേരള സൂക്ഷ്മ- ചെറുകിട- ഇടത്തരം വ്യവസായ സ്ഥാപനങ്ങൾ സുഗമമാക്കൽ (ഭേദഗതി) നിയമം 

 

2021- ലെ ഭേദഗതി നിയമം പ്രാബല്യത്തിൽ വന്നത് 2020 ഒക്ടോബർ 5-ാം തീയതി മുതലാണ്. ‘സൂക്ഷ്മ- ചെറുകിട- ഇടത്തരം വ്യവസായ സ്ഥാപനങ്ങൾ’ എന്നിവയോടൊപ്പം ‘ഇതര വ്യവസായ സ്ഥാപനങ്ങളും’ എന്ന വാക്കുകൾ കൂടി കൂട്ടിച്ചേർക്കപ്പെട്ടു. ഈ രീതിയിലുള്ള ഒരു ഭേദഗതി കൊണ്ടുവന്നത് കേരളത്തിൽ ഏറ്റവും അനുയോജ്യമായ വ്യവസായ സൗഹൃദാന്തരീക്ഷം സൃഷ്ടിക്കുന്നതിനു വേണ്ടിയാണ്. 

 

(4) സംരംഭങ്ങൾക്കുള്ള കെട്ടിട നിർമ്മാണ ചട്ടങ്ങളിൽ ഭേദഗതി

കേരള പഞ്ചായത്ത് / മുൻസിപ്പൽ നിർമ്മാണ ചട്ടങ്ങളിലും ഭേദഗതി വരുത്തിയിട്ടുണ്ട്. കെട്ടിടത്തിന്റെ ഏരിയകൾ  (Plinth & Floor Area) തമ്മിലുള്ള അനുപാതം വർദ്ധിപ്പിച്ച് കൊണ്ട് ഭേദഗതി വരുത്തിയിട്ടുണ്ട്. ഇതിന്റെ ഫലമായി സംരംഭങ്ങൾക്ക് കെട്ടിടം നിർമ്മിക്കുമ്പോൾ കൂടുതൽ ഭൂമി കെട്ടിട നിർമ്മാണത്തിന് ഉപയോഗിക്കാൻ കഴിയുന്നതാണ്. വിസ്തീർണ്ണം 1000 സ്ക്വയർ മീറ്ററിൽ താഴെയും പൊക്കം 15 മീറ്ററിൽ താഴെയുള്ള കെട്ടിടങ്ങൾ നിർമ്മിക്കുന്നതിന് ഫയർ ആന്റ് റെസ്ക്യൂ വകുപ്പിന്റെ എൻ. ഒ. സി ആവശ്യമില്ല. കെട്ടിട നിർമ്മാണ അനുമതികൾ നൽകുന്നതിന് ജില്ലാ ടൗൺ പ്ലാനറെ അധികാരപ്പെടുത്തിയിട്ടുണ്ട്. 

 

(5) ഇൻവെസ്റ്റ്മെന്റ് പ്രൊമോഷൻ ആന്റ് ഫെസിലിറ്റേഷൻ സെൽ (IPF Cell)

സംസ്ഥാന, ജില്ല എന്നിവിടങ്ങളിൽ ലഭിക്കുന്ന അപേക്ഷകൾ സമയബന്ധിതമായി തീർപ്പ് കൽപിക്കുന്നുണ്ടോയെന്ന് വിലയിരുത്തുന്നതിനുള്ള സംവിധാനമാണ് ഐ. പി. എഫ് സെൽ. കേരള ഏകജാലക ക്ലിയറൻസ് ബോർഡിനു വേണ്ടി (Kerala State Single Window Clearance Board) സംയുക്ത അനുമതി നൽകുന്നതിനുള്ള അധികാരവും ഈ സെല്ലിനാണ്. ഒരു പൊതു സോഫ്റ്റ്വെയറിന്റെ സഹായത്തോടെ ഈ സംവിധാനം പ്രവർത്തിക്കുന്നത്. വളരെ വേഗത്തിൽ സംരംഭകന് ഈ സംവിധാനത്തിലൂടെ സേവനം ലഭിക്കുന്നു.

 

(6) സൂക്ഷ്മ- ചെറുകിട- ഇടത്തരം ക്ലിനിക്ക് (MSME Clinic)

സൂക്ഷ്മ- ചെറുകിട ഇടത്തരം സംരംഭങ്ങൾ സംശയരഹിതമായി ആരംഭിക്കുന്നതിനും പ്രവർത്തനങ്ങൾ മെച്ചപ്പെടുത്തുന്നതിനും അവരുടെ പ്രശ്നങ്ങൾ പരിഹരിക്കുന്നതിനാവശ്യമായ ഉപദേശങ്ങൾ നൽകുന്നതിനുവേണ്ടി എല്ലാ ജില്ലകളിലും എം. എസ്. എം. ഇ ക്ലിനിക്കുകൾ ആരംഭിച്ചു. വിവിധ മേഖലകളിൽ വൈദഗ്ദ്ധ്യം തെളിയിച്ചവരെ ഓരോ ജില്ലകളിലും സംരംഭകരെ സഹായിക്കാനുള്ള പാനലിൽ ഉൾപ്പെടുത്തിയിട്ടുണ്ട്. സംരംഭത്തിന്റെ തുടർ പ്രവർത്തനങ്ങൾക്കാവശ്യമായ ലൈസൻസിങ്, മാർക്കറ്റിംഗ്, ധനകാര്യം, സാങ്കേതികം, പ്രോജക്ട് റിപ്പോർട്ട് തയ്യാറാക്കൽ, ആശയങ്ങളുടെ സ്പഷ്ടീകരണം കയറ്റുമതി തുടങ്ങിയ വിവിധ വിഷയങ്ങളിൽ സംരംഭകർക്ക് ഉണ്ടാകുന്ന സംശയങ്ങൾ വ്യക്തമായി പരിഹരിക്കുന്നതിന് എം. എസ്. എം. ഇ ക്ലിനിക്കുകളിലൂടെ കഴിയുന്നു.

 

(7) പരാതി പരിഹാര സംവിധാനം

ഇന്ത്യയിൽ ആദ്യമായി സംസ്ഥാനതല, ജില്ലാതല ഓൺലൈൻ പരാതി പരിഹാര സംവിധാനം പ്രവർത്തനം ആരംഭിച്ചത് കേരളത്തിലാണ്. സംരംഭങ്ങളുടെ പരാതികൾക്ക് 30 ദിവസത്തിനകം തീർപ്പ് കൽപ്പിക്കുന്ന ഓൺലൈൻ സംവിധാനമാണിത്. 10 കോടി വരെ നിക്ഷേപമുള്ള സംരംഭങ്ങളുമായി ബന്ധപ്പെട്ട പരാതികൾ കളക്ടർ അദ്ധ്യക്ഷനും ജില്ലാ വ്യവസായ കേന്ദ്രം ജനറൽ മാനേജർ കൺവീനറുമായ ജില്ലാ സമിതി പരിശോധിക്കും. 10 കോടിയ്ക്ക് മുകളിലുള്ള പരാതികളും ജില്ലാ സമിതി തീരുമാനത്തിലുള്ള അപ്പീലും സംസ്ഥാന സമിതി പരിശോധിക്കുന്നതാണ്. സംസ്ഥാന സമിതിയുടെ കൺവീനർ സംസ്ഥാന വ്യവസായ വകുപ്പ് ഡയറക്ടറും ചെയർമാൻ വ്യവസായ വകുപ്പ് പ്രിൻസിപ്പൽ സെക്രട്ടറിയുമാണ്. സംസ്ഥാന തല ജില്ലാ സമിതിക്ക് സിവിൽ കോടതിയ്ക്കു തുല്യമായ അധികാരവുമുണ്ട്. സേവനം നൽകാൻ നിയുക്തനായ ഉദ്യോഗസ്ഥൻ മതിയായ കാരണം കൂടാതെ കാലതാമസം വരുത്തുകയോ വീഴ്ച വരുത്തുകയോ ചെയ്താൽ പിഴ ചുമത്താനും വകുപ്പ് തല നടപടിക്ക് ശുപാർശ ചെയ്യാനും ഈ സമിതിക്ക് അധികാരമുണ്ട്.

 

പരിഹാരം നിർദ്ദേശിച്ച ശേഷം 15 ദിവസത്തിനകം നടപടിയുണ്ടായില്ലെങ്കിൽ ബന്ധപ്പെട്ട ഉദ്യോഗസ്ഥന് ഒരു ദിവസം 250/- രൂപ എന്ന നിരക്കിൽ പിഴ ഒടുക്കാനും പരമാവധി 10,000 രൂപാ വരെ ഈ രീതിയിൽ പിഴ ഈടാക്കുവാനും അധികാരമുണ്ട്. 17 വകുപ്പുകളുമായി ബന്ധപ്പെട്ട പരാതികൾ http:/grievanceredressalindustry.kerala.gov.in എന്ന പോർട്ടൽ ലിങ്കിലൂടെ അപേക്ഷ സമർപ്പിക്കാവുന്നതാണ്. 

 

മുകളിൽ പ്രതിപാദിച്ച കെ- സ്വിഫ്റ്റ് നിയമങ്ങൾ, ചട്ടങ്ങൾ മുതലായവയെല്ലാം കേരളത്തെ വ്യവസായ സൗഹൃദമാക്കുന്നതിനുള്ള ചുവട് വയ്പുകളാണ്.